Umuti wa Covid-19 wavuzwe muri Madagascar, watangiye kuba imari ihuruza amahanga

Nyuma yo gutangaza ko bavumbuye umuti wahangana na Coronavirus, Tanzania igiye kuba ikindi gihugu mu bya Afurika cyerekeje amaso kuri Madagascar kugira ngo ibe yayiha umuti bivugwa ko uvura indwara ya COVID-19.

Perezida wa Tanzania, John Pombe Magufuli, yatangaje ko yagiranye ibiganiro na Guverinoma ya Madagascar bijyanye no kuba iki gihugu cyaha Tanzania umuti gakondo kivuga ko cyavumbuye uvura COVID-19.

Kuri iki Cyumweru, Perezida Magufuli, yagize ati “Maze iminsi mu biganiro na Madagascar. Bavuga ko bavumbuye umuti wa COVID-19. Tuzohereza indege kugira ngo ijye kuwuzana muri Tanzania kugira ngo abanya-Tanzania bawukoreshe.”

Perezida wa Madagascar, Andry Rajoelina, yavuze ko uyu muti ukoze mu byatsi, uvura abarwayi ba COVID-19 bagakira neza.

Rajoelina yasabye abantu kwizera ubushobozi bw’igihugu cye, ndetse ko amafaranga yose azava mu bikorwa byo gucuruza uyu muti azashyirwa mu kigo cy’ubushakashatsi cya Malagasy.

Yavuze ko igerageza ryakozwe kuri uyu muti bikagaragaza ko ukora neza mu kugabanya no kurandura burundu ibimenyetso bya COVID-19 ku barwayi bayo muri Madagascar.

Gusa OMS yaburiye abantu ku ikoreshwa ry’imiti iyo ariyo yose, aho yavuze ko nta muti cyangwa urukingo by’iyi ndwara biraboneka kugeza ubu.

Kugeza ubu, muri Tanzania habarurwa abantu 480 banduye iyi ndwara, 16 nibo bamaze gupfa. Mu gihe imibare ikomeje kwiyongera, Magufuli yaratsembye avuga ko atazigera afunga ibikorwa.

TERA INKUNGA UMUSOMYI.COM UKORA SHARE Y’IYI NKURU KANDI UTANGE IGITEKEREZO CYAWE KUGIRANGO TURUSHEHO KUBAGEZAHO IBYIZA BYINSHI KANDI BIBARYOHERA

One thought on “Umuti wa Covid-19 wavuzwe muri Madagascar, watangiye kuba imari ihuruza amahanga

Leave a Reply

Your email address will not be published. Required fields are marked *