Umurwayi wa mbere wa COVID-19 muri Tanzania, yapfuye

Minisiteri y’ubuzima mu gihugu cya Tanzania yatangaje ko umuntu wa mbere muri iki gihugu yishwe na coronavirus kuri uyu wa kabiri tariki ya 31 Werurwe 2020, akaba ari umutanzaniya w’imyaka 49.

Mu itangazo ryasohowe n’iyi minisiteri, ivuga ko uyu ari umugabo w’Umutanzania w’imyaka 49 wapfuye uyu munsi kuwa kabiri aho bakurikiranira abafite iyi ndwara ahitwa Mloganzila i Dar es Salaam.

Iyi minisiteri ivuga ko uyu murwayi yari anafite ubundi burwayi asanganywe.

Kugeza ubu muri Tanzania abantu bamenyekanye ko bafite iyi virus ni 19, muri bo umwe yarayikize, undi ni uyu yishe uyu munsi.

Muri aka karere uyu ni umuntu wa kabiri iyi virus yishe nyuma y’uwa mbere yishe muri Kenya mu cyumweru gishize.

Perezida Magufuli wa Tanzania aherutse gutangaza ko ubutegetsi butazafata ingamba zo gufunga insengero – hamwe mu hahurira abantu benshi – kuko mu gusenga ariho hari umuti nyawo w’iyi virus.

Ummy Mwalimu, minisitiri w’ubuzima muri Tanzania aheruka gutangaza ko iki gihugu cyateguye ahantu hatatu hafi ya Dar es Salaam ho gukurikirana abafite n’abakekwaho iyi virus.

Habiri muri aho hantu hazajya hashyirwa abakekwaho iyi virus naho ahandi havurirwa abayirwaye.

Mu byumweru bibiri bishize nibwo muri Tanzania habonetse umuntu wa mbere ufite iyi virus.

TERA INKUNGA UMUSOMYI.COM UKORA SHARE Y’IYI NKURU KANDI UTANGE IGITEKEREZO CYAWE KUGIRANGO TURUSHEHO KUBAGEZAHO IBYIZA BYINSHI KANDI BIBARYOHERA

Leave a Reply

Your email address will not be published. Required fields are marked *