Uburundi bwirukanye abahagarariye OMS ku butaka bwabwo

Kuri uyu wa gatatu tariki ya 13 Gicurasi, Leta y’u Burundi yirukankanye ku butaka bw’iki gihugu abakozi bane b’ishami ry’umuryango w’abibumbye ryita ku buzima (OMS), ishami rya Afurika, nyuma y’igitutu abategetsi b’iki gihugu bakomeje gushyirwaho bashinjwa guha urwaho icyorezo cya Covid-19.

Nk’uko bigaragara mu rwandiko Minisiteri y’ububanyi n’amahanga mu Burundi yandikiye Ishami ry’umuryango w’abibumbye ryita ku buzima ishami rya Afurika, ku wa 12 Gicurasi, abirukanwe ku butaka bw’u Burundi ni Dr Walter Kazadi Mulombo wari uhagarariye muri kiriya gihugu.

Barimo kandi inzobere eshatu za OMS zirimo Dr. Tarzy Daniel, Dr. Ruhana Milindi Bisimwa na Dr. Jean Pierre Mulunda Nkata. Bahawe tariki ya 15 Gicurasi, nk’umunsi ntarengwa bagomba kuba bavuye ku butaka bwa kiriya gihugu.

Uru rwandiko ruragira ruti” Minisiteri y’ububanyi n’amahanga mu Burundi inejejwe no kubamenyesha ko abantu bafite amazina akurikira bagizwe ’abadakenewe’ mu Burundi, bityo bakaba bagomba kuba bavuye ku butaka bw’u Burundi mbere y’itariki 15 Gicurasi.”

Inzobere za OMS zirukanwe mu Burundi, mu gihe abategetsi b’iki gihugu bashinja guha urwaho icyorezo cya Covid-19 bitwaje ko nta kibaho.

Ubwo yifatanyaga n’Abarundi kwizihiza Umunsi mpuzamahanga w’Umurimo ku wa 01 Gicurasi, Perezida Pierre Nkurunziza yavuze ko abavuga ko kwirinda kwegerana birinda icyorezo cya Coronavirus (Covid-19) babeshya, ngo kuko Imana itabirimo byose ntacyo byamara.

Amagambo ya Perezida Nkurunziza yanashimangiwe na Maj. Gen. Evariste Ndayishimiye, umukandida uhagarariye ishyaka CNDD-FDD mu matora y’umukuru w’igihugu ateganyijwe mu cyumweru gitaha.

Ubwo yari mu bikorwa by’ishyaka abereye umukandida mu minsi yashize, Gen. Ndayishimiye yavuze ko abavuga ko hari icyorezo cyitwa Coronavirs babeshya.

Yagize ati” Ndashaka kubatera imbaraga. Nta muntu ukwiye kubabeshya ko hari icyorezo cyitwa coronavirus. Ibyo ntibizabura kubaho ariko abafite amahirwe ni abizera uburinzi bw’Imana. Yahitanye ubuzima bw’abantu benshi mu tundi turere tw’isi ariko Imana yarinze u Burundi iyo virusi.”

Gen. Ndayishimiye yongeyeho ko mu gihe abaturage b’ibindi bihugu bari mu ngo zabo kubera Covid-19, Imana yatumye Abarundi bo birirwa bahurira hamwe kugira ngo bishimane.

Imibare y’Ikigo cy’Ubuvuzi gishamikiye ku Muryango w’Afurika Yunze Ubumwe (Africa CDC) igaragaza ko mu Burundi hamaze kugaragara abantu 15 banduye Covid-19, muri bo hapfuyemo umwe, abandi barindwi bamaze gukira.

TERA INKUNGA UMUSOMYI.COM UKORA SHARE Y’IYI NKURU KANDI UTANGE IGITEKEREZO CYAWE KUGIRANGO TURUSHEHO KUBAGEZAHO IBYIZA BYINSHI KANDI BIBARYOHERA

 

Leave a Reply

Your email address will not be published. Required fields are marked *