Rwanda: Ibishorobwa byangije ibimera byo mu nzuri zingana na hegitari 30

Amakuru atugeraho avuga ko mu ntangiriro z’ukwezi kwa Mata uyu mwaka, ari bwo mu Mirenge ya Tabagwe, Karangazi n’agace gato ka Rwimiyaga hagaragaye ibishorobwa mu nzuri z’aborozi.

Kagwa André, umuyobozi wa RAB Sitasiyo ya Nyagatare, avuga ko ibishorobwa biterwa n’imihindagurikire y’ikirere.

Avuga ko uburyo bwo kubirwanya ari uguhinga aho byagaragaye bigatoragurwa bikicwa na ho nta wundi muti ushoboka.

Ati “Nta bundi buryo buhari bwo kubirwanya kuko nta muti ubyica wagera mu butaka. Igisubizo ni uguhinga aho byagaragaye, hagacocwa, bakabitoragura bikicwa. Uburyo bwo kubyica ni bwinshi hacukurwa umwobo bigashyirwamo bigatwikwa, kubitera umuti cyangwa ubundi buryo bwose bwo kubyica”.

Kayumba Samuel, umworozi mu Murenge wa Karangazi avuga ko hegitari esheshatu kuri 25 afite, ari zo zagaragayemo ibishorobwa.

Avuga ko nubwo ari nkeya ariko bitabura guhungabanya ubworozi bwe kuko aho byari biri hahinzwe inka zitakihagera. Icyakora ashima Leta kuko ari yo yashoye byinshi ugereranyije na bo.

Ati “Urumva nubwo ari hatoya ariko inka ntiziharisha, icyakora ubuyobozi bwaradufashije bwazanye imashini zirahahinga aho byagaragaye, batuzanira ubwatsi akazi kacu ni ugutera gusa. Urumva ko ibishoro byinshi ni ibya Leta, utashima sinzi uko yaba ameze. Ubwatsi bwatangiye kumera ndumva nta kibazo tuzagira”.

Uretse ibishorobwa biri mu nzuri z’aborozi mu Karere ka Nyagatare kandi aborozi bafite ikibazo cy’inzuri zabo zarengewe n’amazi kubera umwuzure. Bamwe baribaza aho baganisha amatungo yabo.

 

Kugeza uyu munsi hegitari 30 z’inzuri ni zo zizwi zagezemo ibishorobwa zikaba zirimo guhingwa zikanaterwa ubwatsi bushya.

Nyamara ariko umwuzure mu nzuri mu Mirenge ya Rukomo, Rwempasha, Nyagatare na Karangazi ubuso bwarengewe ntiburamenyekana.

Rutayisire Gilbert, umukozi w’Akarere ka Nyagatare uyobora ishami ry’ubuhinzi, ubworozi, amashyamba n’umutungo kamere, avuga ko zaba inzuri zagaragayemo ibishorobwa ndetse n’izarengewe n’amazi, banyirazo nta kibazo baragira gikomeye kuko byafashe uruhande ruto ndetse amazi yo akaba ashobora gukamuka vuba ubwatsi butarangirika.

DORE FILIMI UTACIKWA KUREBA HANO

TERA INKUNGA UMUSOMYI.COM UKORA SHARE Y’IYI NKURU KANDI UTANGE IGITEKEREZO CYAWE KUGIRANGO TURUSHEHO KUBAGEZAHO IBYIZA BYINSHI KANDI BIBARYOHERA

Leave a Reply

Your email address will not be published. Required fields are marked *