Rusizi: Umusaza,68, yapfuye yimanitse, aba uwa gatatu ubikoze mu muryango we

Mu kagari ka Kiziguro, mu murenge wa Nkungu mu karere ka Rusizi, umusaza Hategekimana Appolinaire w’imyaka 68 y’amavuko, yapfuye yiyahuye.

Kugeza ubu icyabimuteye kikaba kikiri amayobera nk’uko bivugwa n’abaturanyi be n’ubuyobozi , bivugwa kandi ko uyu abaye uwa 3 mu muryango upfuye atyo nyuma ya bakuru be 2 na bo bapfuye biyahuye.

Nk’uko Bwiza dukesha iyi nkuru yabitangarijwe n’umunyamabanga nshingwabikorwa w’Akagari ka Kiziguro, Ngirinshuti Jean Pierre, ngo uyu musaza wabanaga n’umugore we n’umukobwa wabo w’umuhererezi w’imyaka 20 y’amavuko wigaga mu wa 4 w’ayisumbuye muri EAV Ntendezi mu karere ka Nyamasheke, mu gitondo cyo kuri uyu wa 15 Gicurasi yababwiye ngo bajye guhinga arasigara yahirira inka n’andi matungo bafite, bamusiga mu rugo bajya guhinga.

Ngo mu ma saa kenda z’igicamunsi ni bwo uwo mukobwa wabo yatashye agiye gutegura ibyo bararira asiga nyina mu murima, ageze mu rugo akinguye icyumba ababyeyi bararamo asanga se yimanitse mu mugozi w’ishati yamaze gushiramo umwuka, umukobwa we yahise atabaza abaturage n’inzego z’ubuyobozi.

Gitifu Ngirinshuti ati’’ Twahuruye dusanga yapfuye, ikigaragara kikaba ko kwiyahura yari yabiteguye kuko twasanze yabanje koga, yambara neza ashwanyuza imwe mu mashati ye ashaje acamo umugozi yiyahuje. Kugeza ubu ntituzi impamvu yabimuteye, kuko n’amakimbirane ashingiye ku mutungo yari yarigeze kugirana n’umugore we twari tumaze imyaka 3 tuyakemuye bavuze ko bagiye kubana neza, nta kibazo cyabo kindi twari duherutse kumva.’’

Igikomeje gutera urujijo mu baturage b’uyu mudugudu wa Kadashya muri aka kagari ka Kiziguro , ni uko uyu musaza abaye uwa 3 mu muryango wabo upfuye yiyahuye nyuma ya bakuru be 2 na bo bapfuye batya, abaturage bagatekereza ko ari ababa babaroga cyangwa ibyo mu miryango yabo byaba bibibatera.

Umwe mu baturanyi be yabwiye Bwiza ati ’’ Twebwe ibi bintu byatuyobeye pe. Uyu abaye uwa 3 wiyahuye muri uyu mudugudu kandi bose baravukana. Muri 2013 mukuru we yapfuye yiyahuye asiga umugore n’abana 10 kandi nta cyamenyekanye cyabimuteye. Muri 2017 undi muvandimwe we na we apfa atyo ntitwamenya impamvu yiyahuye, none kuri uyu wa 15 Gicurasi 2020 na we ariyahuye kandi nta kindi batubwira cyabimuteye. Ubwo se twabura kubyibazaho dute, cyane cyane ko mu bice by’ino hakunda kuvugwa amarozi yo gushambagiza umuntu akaba yakwihemukira gutya?’’

Yakomeje ati ’’ Hari n’abavuga ko ari ibidayimoni byo mu muryango wabo byaba bibibatera ariko byose nta gihamya bifitiwe, gusa ni ikibazo , n’abandi bavandimwe be ubona bafite ubwoba ko na bo ari rwo bazapfa, ntawamenya.’’

Ibi ariko umuyobozi w’Akarere ka Rusizi Kayumba Ephrem asaba abaturage kubyima amatwi, cyane cyane ko iperereza kuri uru rupfu ryatangiye ngo hamenyekane icyamuteye kwiyahura haherewe ku gukurikirana niba koko aya makimbirane yo mu muryango yarashize cyangwa ariyo ntandaro.

Umurambo wa nyakwigendera wahise ujyanwa mu bitaro bya Mibilizi gukorerwa isuzuma mbere y’uko ushyingurwa kuri uyu wa 16 Gicurasi.

KANDA HANO WIREBERE AGAHINDA K’UYU MWANA, NTUCIKWE!

TERA INKUNGA UMUSOMYI.COM UKORA SHARE Y’IYI NKURU KANDI UTANGE IGITEKEREZO CYAWE KUGIRANGO TURUSHEHO KUBAGEZAHO IBYIZA BYINSHI KANDI BIBARYOHERA

Leave a Reply

Your email address will not be published. Required fields are marked *