Nyuma yo gukuraho amafaranga akatwa wohereza, aba Agent bamazwe impungenge ko nta gihombo bazagira

Abacuruza Mobile Money bijejwe ko nta gihombo bazaterwa n’ibyemezo bya Banki Nkuru y’u Rwanda (BNR) byo guteza imbere guhererekanya amafaranga no kwishyurana hakoreshejwe ikoranabuhanga mu rwego rwo kurwanya coronavirus, kuko amafaranga bishyurwa ku muntu babikirije (komisiyo) atakuweho kandi n’uzakenera kubikuza bakazajya bamukata nk’uko bisanzwe.

Mu gihe bamwe bishimira icyemezo cya BNR cyo gukurirwaho amafaranga bakatwaga baherekenya amafaranga bakoresheje ikoranabuhanga, abacuruzi ba Mobile Money batangiye kugaragaza ko bazabihomberamo kubera bungukiraga ku mafaranga bakata abohererezanya amafaranga.

Rutagengwa Arthur ushinzwe imikorere ya Mobile Money muri Sosiyete y’Itumanaho ya MTN Rwanda, yabwiye Radiyo Rwanda ko abo bacuruzi (agents) ntacyo bazahomba kuko amafaranga bagenerwa ku muntu babikilije atakuweho.

Ati “Iyo umukiliya aje avuga ngo ndashaka kubitsa, uwo mukiliya amuha 1000 Frw n’umu-agent akamuha amafaranga 1000 kuri telefoni ye ariko iyo amufashije muri ubwo buryo tumuha komisiyo, izo komisiyo ntabwo zavuyeho urumva ko ntacyo yahombye aracyafasha abakiliya kugira ngo amafaranga yinjire kuri telefoni zabo.”

Abacuruzi ba Mobile Money baganiriye na Radiyo Rwanda bavuze ko bizatuma, bakoresha ku gishoro bahabwa kuko ayo bakataga yabafashaga mu mibereho yabo.

Ku rundi ruhande ariko hari uwahishuye ko nubundi koherereza umuntu amafaranga bitari byemewe ahubwo babikoraga kugira ngo babone ayo kubabeshaho mu gihe bategereje iyo Komisiyo.

Yagize ati “Kuri twebwe hari amafaranga twacaga umukiliya yo kohereza no kubikura, ubundi batubwira ngo koherereza umukiliya ntabwo byemewe ariko hari igihe umuntu aza akambwira ati jye nyoherereza ukamwoherereza wenda nawe ayo 250 Frw cyangwa ayo 200 Frw akakugirira akamaro mu gihe wicaye hano utegereje ko ukwezi kwashira ngo ugire icyo ubona.”

BNR itangaza ko ikigamijwe ari ukugira ngo abantu bahane serivisi, baherekanye amafaranga kandi bishyurane bitabasabye guhererekanya amafaranga mu rwego rwo kwirinda icyorezo cya coronavirus.

Guverineri wa BNR, John Rwangombwa na we ashimangira ko nta muntu uzabihomberamo kuko abanyarwanda bazagira ukwirinda kandi n’inyungu y’abacuruza Mobile Money itazahungabana.

Ati “Nukenera kujya gukura amafaranga yawe kuri telefoni, icyo gihe bazakwishyuza. ariko ugiye gafata amafaranga yawe ngo uyashyire kuri telefoni yawe uyoherereze undi muntu cyangwa uyakoreshe kugura ibintu ntabwo wishyura. Icyo twashishikariza abantu rwose duhagarike ibintu byo gukoresha kashi.”

Ku rundi ruhannde uretse kwirinda coronavirus iyi ni gahunda igaragara ko izateza imbere uburyo bwo guhererekanya no kwishyurana hakoreshejwe ikoranabuhanga (Cashless).

Mu rwego rwo gushishikariza abantu kwishyurana no kohererezanya amafaranga batayahererekanyije mu ntoki bishobora gukwirakwiza Coronavirus, BNR yemeje ko mu gihe cy’amezi atatu uhereye tariki 19 Werurwe 2020 nta kiguzi kizongera gucibwa umuntu ukura amafaranga kuri konti yo muri banki ayashyira kuri Mobile Money cyangwa ayakura kuri Mobile Money ayohereza kuri banki.

Ibyo kandi bizajyana n’uko nta kiguzi kizongera gucibwa abantu bahererekanya amafaranga kuri Mobile Money cyangwa umucuruzi mu gihe yishyuwe hakoreshejwe imiyoboro y’ibigo by’itumanaho (Mobile Money na Virtual POS).

BNR yatangaje ko izakomeza gukurikirana ishyirwa mu bikorwa ry’izo ngamba no gukomeza gusesengura ingaruka za Coronavirus kandi yiteguye kuba yafata izindi ngamba zikwiye.

TERA INKUNGA UMUSOMYI.COM UKORA SHARE Y’IYI NKURU KANDI UTANGE IGITEKEREZO CYAWE KUGIRANGO TURUSHEHO KUBAGEZAHO IBYIZA BYINSHI KANDI BIBARYOHERA

Leave a Reply

Your email address will not be published. Required fields are marked *