Nyuma y’imyitozo ya gisirikari, Rutahizamu wa Tottenham agiye kugaruka i London

Son, rutahizamu ukomeye w’ikipe ya Tottenham Hotspur, akaba umunya-Koreya y’Epfo, amaze iminsi mu myitozo ya gisirikari mu gihe Shampiyona zahagaze kubera icyorezo cya Covid-19.

Amakuru avuga ko uyu mukinnyi yagiye muri iyi myitozo amaramo ibyumweru bitatu, aho yamaze iminsi ari kumwe n’abandi biga kurasa ku kirwa cya Jeju kiri mu gihugu cye cy’amavuko.

Amafoto Son yafashwe, yari asubiye mu kigo bacumbikiwemo, hamwe ba bagenzi be. Agaragara mu myambaro, ingofero y’icyuma bya gisirikare bifite nimero y’136, ahetse imbunda mu mugongo.

Ikipe ye ya Tottenham yatangaje ko uyu musore Son yarangije iyi myitozo, kandi ko mu cyumweru gitaha araba ari i London mu gihugu cy’Ubwongereza.

Son Heung-min aba yarakoze imyitozo ya gisirikare y’amezi 21 nk’izindi ngimbi zo muri Koreya y’Epfo, Son w’imyaka 27 y’amavuko aba yarakoze imyitozo ya gisirikare y’amezi atatu ariko yakomorewe mu 2018 bitewe n’uko yari amaze gufasha ikipe y’igihugu gutwara igikombe cy’Irushanwa ryo muri Aziya.

Dore byinshi wamenya kuri iyi myitozo

Iyi myitozo ingimbi zose zinyuramo yatangiye mu 1957, ikaba itegeko ku musore wagejeje ku myaka y’ubukure (18) kugeza ku myaka 28 y’amavuko gusa ngo iyi myaka ishobora kwigizwa inyuma mu gihe yaba ari mu bindi bikorwa nk’amasomo asanzwe.

Iyi myitozo kandi ikorwa mu buryo ndetse n’igihe gitandukanye. Iyo ku butaka ikorwa mu mezi 18, iyo mu mazi igakorwa mu mezi 20, mu gihe iyo mu kirere ikorwa mu mezi 21.

Abitabira iyi myitozo ni ababa bagaragayeho ubuzima bwiza ndetse n’imbaraga byatuma binjira mu gisirikare. Iyo iyi myitozo irangiye, buri minsi itatu mu mwaka, aba basore basabwa kwitabira indi myitozo mu gihe cy’imyaka itandatu.

Park Chung-hee wabaye Perezida wa Koreya y’Epfo yashyizeho urutonde rw’abantu bazajya bakomorerwa, ntibakore iyi myitozo uko bikwiye mu 1973. Ibi byarebaga cyane abaserukiraga igihugu mu mikino ngororamubiri, kugira ngo babone uburyo bitegura gutwara imidari, bayimurikira abanyagihugu.

Ni koko byarabaye, mu 1976 umukiranyi (biva ku nshinga ‘gukirana’) Yang Jung-mo yatwaye umudari wa zahabu (uhabwa uwabaye uwa mbere) mu mikino ya Olympique maze akomorerwa kutajya muri iyi myitozo.

Mu irushanwa ry’Igikombe cy’Isi mu 2002, abakinnyi bari bagize ikipe y’igihugu y’umupira w’amaguru barakomorewe, bakurirwaho iyi myitozo. Abari bitabiriye irushanwa rya ‘Baseball’ ku rwego rw’Isi mu 2006, nabo basezeranyijwe ko nibagera mu mikino ine ya nyuma, bakomorerwa.

Abakinnyi mu mikino itandukanye bakomeje gukomorerwa kugeza kuri Heun-min Son mu 2018 wegukanye umudari wa zahabu mu irushanwa rihuza ibihugu biri ku mugabane w’Aziya. Muri icyo gihe kandi, Lee Jung-hoo wegukanye uyu mudari mu mukino wa ‘Baseball’ muri iri rushanwa, na we yarakomorewe.

Abacuranzi b’ibinanda (Violin), Piano ndetse n’ababyinnyi ba gakondo baserukira igihugu mu muco, nabo barakomorerwa gusa ab’injyana zigezweho, abakinnyi ba filime n’abaziyobora bose bajya muri iyi myitozo mu gihe cyose cyagenwe.

Gukomorera urubyiruko biri mu nshingano za Minisiteri y’Ingabo ndetse, Minisiteri ya Siporo na Minisiteri y’Umuco. Ku baririmbyi b’injyana zigezweho nk’itsinda rya BTS, Minisitiri w’Umuco Park Yang-woo mu 2019 yasobanuye ko iri tsinda ritazakomorerwa bitewe n’umwanzuro wafashwe n’igisirikare, bitewe n’uko riririmba mu njyana ya ‘pop’ iri ku rutonde rw’izidakomorerwa. Hari nyuma y’ubusabe bw’abakunzi b’iri tsinda.

Abahanga mu by’umutekano n’ubumenyi bw’intambara bavuga ko iyi myitozo ihabwa urubyiruko rwose rw’ingimbi igamije kubategura ku buryo bashobora kurwanirira igihugu cyabo mu gihe cyatewe. Amateka agaragaza ko yashyizweho nyuma gato y’intambara yahuzaga iki gihugu na Koreya ya Ruguru yabaye kuva mu 1950 kugeza mu 1953.

TERA INKUNGA UMUSOMYI.COM UKORA SHARE Y’IYI NKURU KANDI UTANGE IGITEKEREZO CYAWE KUGIRANGO TURUSHEHO KUBAGEZAHO IBYIZA BYINSHI KANDI BIBARYOHERA

One thought on “Nyuma y’imyitozo ya gisirikari, Rutahizamu wa Tottenham agiye kugaruka i London

Leave a Reply

Your email address will not be published. Required fields are marked *