Nyaruguru: Basanze Agoronome yapfiriye mu mugozi, asiga umugore arwariye Faisal

Umugabo witwa Harerimana Emmanuel wo mu Murenge wa Munini mu Karere ka Nyaruguru wari Agronome mu cyayi bamusanze mu cyumba cy’inzu ye yapfuye amanitse mu mugozi ukoze mu nzitiramibu bikekwa ko yiyahuye.

Byabaye mu masaha y’ikigoroba kuri uyu wa Gatatu ahagana saa kumi; mu Mudugudu wa Akarehe mu Kagari ka Ngarurira mu rugo rwe aho yari asanzwe atuye.

Umukozi we wo mu rugo ni we watanze amakuru ko amubonye arimo kwiyahura nk’uko bamwe mu baturanyi be babitangaje.

Umwe yagize ati “Umukozi we ni we uduhuruje atubwira ko shebuja yikingiranye mu cyumba kiri haruguru y’uruganiriro ngo yarebeye mu kirahuri cy’idirishya abona yimanitse mu mugozi. Twaje tuhageza dusanga yiyahuye yapfuye.”

Byabaye mu gihe umugore we yari mu Bitaro byitiriwe Umwami Faisal mu Mujyi wa Kigali aho amaze igihe arwariye umugongo.

Bamwe mu baturanyi ba Harerimana bavuga ko nta kibazo bari bazi afite uretse ko yakundaga kunywa inzoga agasinda.

Umunyamabanga Nshingwabikorwa w’umurenge wa Munini, Nkurunziza Afrodis, yavuze ko nta bibazo bari bazi afite uretse ubusinzi.

Ati “Yanywaga inzoga agasinda agasakuza bikagaragara ko atazishoboye; nta kindi kibazo tuzi yari afite cyangwa afitanye n’umugore we.”

Nkurunziza yavuze ko bamaze kwica urugi rw’icyumba yari yikingiranyemo basanze yasize yanditse urupapuro ‘asezera ku mugore n’abana be; asoza avuga ko nta muntu ari bubeshyere ko ahubwo ngo azize ibibazo by’ubusinzi kuko ngo yabonye imico y’ubusinzi bwe itakomeza kwihanganirwa’.

Umunyamabanga Nshingwabikorwa w’Umurenge wa Munini, Nkurunziza Afrodis, yasabye abaturage kwirinda kwiyambura ubuzima kandi igihe bafite ibibazo bakwiye guharanira kubikemura no kugisha inama.

Umurambo wa Harerimana Emmanuel wajyanywe ku Bitaro bya Munini gukorerwa isuzuma. Asize umugore n’abana babiri.

TERA INKUNGA UMUSOMYI.COM UKORA SHARE Y’IYI NKURU KANDI UTANGE IGITEKEREZO CYAWE KUGIRANGO TURUSHEHO KUBAGEZAHO IBYIZA BYINSHI KANDI BIBARYOHERA

One thought on “Nyaruguru: Basanze Agoronome yapfiriye mu mugozi, asiga umugore arwariye Faisal

  1. Mwiriwe neza nagirango muzadukorere ubushakashatsi kumpamvu irigutuma abantu biyahura cyane kuko birakabije.

Leave a Reply

Your email address will not be published. Required fields are marked *