Muri Nigeria habonetse umuntu wa mbere urwaye Coronavirus

Amakuru aremeza neza ko umuntu wa mbere wanduye Coronavirus yabonetse muri Nigeria, kiba igihugu cya mbere cyo muri Afurika yo munsi y’Ubutayu bwa Sahara iyo ndwara ibonetsemo.

Uwagaragaweho icyo cyorezo ni umutaliyani wakoreraga muri Nigeria wageze mu mujyi wa Lagos tariki 25 Gashyantare avuye mu Mujyi wa Milan.

Ubuyobozi muri Nigeria bwatangaje ko uwo murwayi yashyizwe mu bitaro aho ari kwitabwaho kandi ngo ibimenyetso agaragaza ntabwo bikabije cyane.

Guverinoma ya Nigeria yatangaje ko yamaze gutegura ahantu ho kwakirira abagaragayeho Coronavirus no gushyiraho ingamba zigamije gukumira icyo cyorezo.

Hatangiye gushakishwa abantu bose baba barahuye n’uwo wagaragaweho Coronavirus mbere y’uko inzego z’ubuzima zimubona ubwo yagarukaga muri Nigeria.

Kugeza ubu abantu basaga 80 000 ku Isi hose bamaze kwandura Coronavirus mu bihugu bisaga 40 hirya no hino ku Isi, mu gihe abasaga 60 bamaze guhitanwa nayo mu bihugu biri hanze y’u Bushinwa aho indwara yatangiriye. Hanze y’u Bushinwa imibare y’abandura Coronavirus ikomeje kwiyongera mu gihe imbere mu Bushinwa iri kugabanyuka.

Algeria na Misiri nibyo bihugu bya mbere bya Afurika byemeje ko habonetse abarwaye Coronavirus.

TERA INKUNGA UMUSOMYI.COM UKORA SHARE Y’IYI NKURU KANDI UTANGE IGITEKEREZO CYAWE KUGIRANGO TURUSHEHO KUBAGEZAHO IBYIZA BYINSHI KANDI BIBARYOHERA

Leave a Reply

Your email address will not be published. Required fields are marked *