Muri Congo 2 bishwe na Coronavirus, 36 bamaze kuyandura

Abantu 36 bamaze kwandura Coronavirus muri Repubulika ya Demokarasi ya Congo, mu gihe abantu babiri bamaze guhitanwa n’iki cyorezo cyibasiye Isi yose.

Umuhuzabikorwa wa Komisiyo y’Itumanaho muri Minisiteri y’Ubuzima ya RDC, Raoul Kamanda, yatangaje ko kuri uyu wa Mbere, tariki ya 23 Werurwe 2020 habonetse abarwayi bashya batandatu mu Mujyi wa Kinshasa.

Inzego z’ubuzima muri RDC zivuga ko muri iki gihugu hamaze kuboneka abarwayi ba Coronavirus 36 muri bo babiri bitabye Imana, mu gihe banahuye n’abasaga 772 kuva iki cyorezo cyatahurwa.

Raoul Kamanda yasabye abaturage bagikerensa kubaho kwa Coronavirus ko bareka gusuzugura ingamba z’isuku zatangajwe n’abayobozi.

Radio Okapi yatangaje ko mu izina rya Minisiteri y’Ubuzima, abarwayi babiri bagaragaweho Coronavirus bameze neza ndetse bashobora kuva mu bitaro mu gihe cya vuba.

Ku wa 10 Werurwe 2020 nibwo umuntu wa mbere muri RDC yatahuweho Coronavirus, Umubiligi wari umaze iminsi mu gihugu akurikiranwa n’ubuyobozi bw’inzego z’ubuzima, ashyirwa no mu kato.

Iyi ndwara yakomeje kwiyongera, ku buryo ku wa 19 Werurwe 2020 byemejwe ko Minisitiri w’Ubukungu, Acacia Bandubola Mbong; Umuyobozi Mukuru wungirije muri iyo Minisiteri n’umugore we bapimwe basanga barwaye Coronavirus, bahita bashyirwa mu kato hamwe n’umugabo wa Minisitiri.

TERA INKUNGA UMUSOMYI.COM UKORA SHARE Y’IYI NKURU KANDI UTANGE IGITEKEREZO CYAWE KUGIRANGO TURUSHEHO KUBAGEZAHO IBYIZA BYINSHI KANDI BIBARYOHERA

Leave a Reply

Your email address will not be published. Required fields are marked *