Munyaneza Didier witabiriye TdRwanda2020, yapfushije umwana we w’imfura

Umukinnyi usiganwa ku magare, Munyaneza Didier uzwi nka Mbappé, n’umufasha we, Niyomubyeyi Joselyne, babuze imfura yabo bibarutse tariki 12 Gashyantare 2020, nyuma y’amezi abiri barushinze.

Didier Munyaneza yakinnye Tour du Rwanda 2020, uyu mwana we ari mu bitaro, ku buryo uyu mukinnyi yanavuze ko bitamworoheye gukina umwana we atameze neza kuko yari afite indwara ikomeye.

Umwe mu bari hafi y’uyu muryango, yabwiye FunClub ko Tour du Rwanda yatangiye umwana w’uyu mukinnyi wa Benediction ari mu bitaro kuko yabyinjiyemo tariki ya 19 Gashyantare ku buryo bitamworoheye gukina neza uko yabyifuzaga.

Avuga ko Munyaneza yari anagiye kureka gukina ariko kuko byasaga nk’aho byakererewe arihangana akina Tour du Rwanda, umwana aza gusohoka mu bitaro irushanwa rigeze ku munsi wa gatandatu, ariko nyuma biza kongera kuba bibi yitaba Imana kuri uyu wa Gatatu.

Uyu musore byatumye atitwara neza uko yabyifuzaga, gusa ari mu banyarwanda bagerageje gukina neza kuko irushanwa ryarangiye afite umwambaro w’umukinnyi uhangana kurusha abandi, akaba yarabaye n’uwa kane mu gace ka Kigali-Huye, anaza ku mwanya wa 4 ku rutonde rw’abakinnyi bazamuka neza kurusha abandi.

Didier Munyaneza afite imyaka 22 gusa y’amavuko, akaba yaratangiye kumeyekana muri 2017, ariko izina rye rizamuka cyane muri 2018. Ari mu bakinnyi bitwaye neza muri uyu mwaka wa 2019, aho aheruka kwegukana Tour du Sénégal yari yitabiriwe n’Ikipe ye ya Benediction Excel Energy.

Yabaye kandi umukinnyi ukiri muto witwaye neza kurusha abandi muri La Tropicale Amissa Bongo, aho kuri ubu aherutse gutoranywa mu bakinnyi 15 bazavamo umukinnyi w’umwaka wa 2019 muri Afurika.

Uyu mukinnyi ni we watsinze amarushanwa menshi mu masiganwa y’imbere mu gihugu (Rwanda Cycling Cup 2019), aho uyu mwaka yegukanye Farmers Circuit, Kivu Race n’isiganwa rya nyuma rya Kigali- Rwamagana- Kigali.

TERA INKUNGA UMUSOMYI.COM UKORA SHARE Y’IYI NKURU KANDI UTANGE IGITEKEREZO CYAWE KUGIRANGO TURUSHEHO KUBAGEZAHO IBYIZA BYINSHI KANDI BIBARYOHERA

Leave a Reply

Your email address will not be published. Required fields are marked *