Malina, Social Mula na Riderman bategerejwe mu gitaramo kigiye kubera mu Bubiligi

Itariki ya 22 Gashyantare ni umunsi uzahuriza hamwe mu gitaramo gikomeye, abanyarwanda n’inshuti zabo batuye, biga cyangwa bakorera mu Bubiligi no mu nkengero zabwo; icyo gitaramo kikaba cyaratumiwemo abahanzi bakunzwe mu Rwanda barimo Marina, Social Mula na Riderman, aho baazaba kandi bari kumwe na DJ Princess Flor uzavanga indirimbo mu buhanga asanzwe azwiho, akazafatanya na Dj Toxxyk uzaba aturutse i Kigali.

Aba bahanzi ubu bamaze kubona ibyangombwa byose bibahesha uburenganzira bwo kuzishimana n’abakunzi babo babategereje, bati “Inkoko ni yo ngoma”.

Iki gitaramo cyatewe inkunga n’ikigo cy’u Rwanda gikora ubwikorezi bw’indege, RwandAir, kinafite ibiro bigihagarariye i Bruxelles mu Bubiligi aho gikorera ingendo eshatu mu cyumweru, Kigali-Bruxelles, Bruxelles-Kigali, ku wa Kabiri, ku wa Kane no ku wa Gatandatu.

Iki gitaramo cyateguwe na Team Production imenyereye gutegura ibitaramo no guha umwanya abahanzi b’Abanyarwanda n’abandi banyafurika baturuka hirya no hino, ngo bagaragaze injyana y’iwabo.

Justin Karekezi uyobora Team Production yabwiye itangazamakuru mu Bubiligi ati ”Twishimiye kwakira aba bahanzi nyuma y‘iminsi itari mike nta gitaramo dutegurira abadukurikira kandi bitabira cyane ibikorwa dutegura, ariko mu rwego rwo gutangirana umwaka mushya wa 2020 twabazaniye bariya bahanzi bakunzwe mu Rwanda ngo twishimire ibyo twagezeho, kandi dushyiramo imbaraga mu gukomeza guhura turuhura umutwe kandi duteza imbere abahanzi.”

Yakomeje ati ”Buriya abahanzi n’ubuhanzi ni ubukungu bufatika haba mu mafaranga no mu bitekerezo bifukuye, ni ibikorwa bihuza abantu, ni nka siporo nk’uko Perezida Kagame aherutse kubivuga mu kiganiro yagiranye n’igitangazamakuru cya hano mu Burayi “Le Point”. Iyo ukora siporo cyangwa uri umuhanzi, ntureba ngo uyu aturuka aha cyangwa uyu ni iki, muba muri mu gikorwa cy’ubusabane n’ubumwe. Ibi rero ni ubukungu bukomeye.”

Karekezi yashishikarije urubyiruko n’abakuru kuzitabira iki gitaramo, bagasabana bifurizanya ibihe byiza bitangira umwaka.

Yakomeje ati “Muri iki gitaramo kandi hazatangwamo amahirwe yo gutombola itike y’indege izatuma batembera aho bashatse mu bice 29 RwandAir igeramo.”

Iki gitaramo kizabera ahitwa Birmingham Place, 112 Rue de Birmingham Straat, 1070 Anderlecht ku wa 22 Gashyantare 2020, guhera saa mbiri z’umugoroba kugeza mu gitondo.

Leave a Reply

Your email address will not be published. Required fields are marked *