Kinshasa: Impanuka ikomeye yahitanye abasaga 40, abandi benshi barakomereka

Impanuka ikomeye yabereye mu masangano y’imihanda y’ahitwa Ngaba mu mujyi wa Kinshasa, yasize ababarirwa muri 40 bitabye Imana, abandi benshi barakomereka.

Iyi mpanuka yabaye ku gicamunsi cy’ejo ku Cyumweru tariki 16 Gashyantare. Ababonye iyi mpanuka iba, babwiye ibitangazamakuru byo muri Repubulika iharanira Demokarasi ya Congo ko yatewe n’ikamyo yari yikoreye amabuye yabuze feri (frein) bikarangira igonze izindi modoka umunani ndetse na za moto zibarirwa mu icumi.

Abatari bake bahise bahasiga ubuzima, na ho abari bakomeretse bihutishirizwa kugezwa ku bitaro bya Kaminuza y’i Kinshasa n’abakorerabushake.

Hari ibitangazamakuru byinshi byo muri Repubulika iharanira Demokarasi ya Congo nka Le Potentiel, 4 pouvoir, politico n’ibindi; byatangaje ko abitabye Imana barenga 40, mu gihe nka 7 sur 7 yo yatangaje ko abitabye Imana ari 14 na ho abakomeretse bakarenga 60.

Iyi mpanuka yashenguye abatari bake barimo na Perezida Antoine Felix Tshisekedi wa Repubulika iharanira Demokarasi ya Congo. Perezida Tshisekedi abinyujije ku rubuga rwa Twitter ya Perezidansi ye, yihanganishije imiryango y’ababuriye ababo muri iriya mpanuka.

Ati” Ni umubabaro mwinshi, namenye Impanuka yabaye kuri iki cyumweru ku wa 16 Gashyantare yabereye mu mahuriro y’imihanda i Ngaba igateza imfu n’ugukomereka bikabije. Nihanganishije cyane imiryango y’ababuze ababo.”

Perezida Tshisekedi yanategetse ko hahita hakorwa iperereza ku cyaba cyihishe inyuma y’iriya mpanuka.

Polisi ya Repubulika iharanira Demokarasi ya Congo yahise itangira gukora iperereza kuri iriya mpanuka, gusa nta tangazo rigaragaza icyayiteye irashyira ahagaragara.

Leave a Reply

Your email address will not be published. Required fields are marked *