Ese Diamond Dreams yaba isenyutse burundu? Menya byose aka kanya

Umwuka si mwiza mu buyobozi bwa sosiyete Diamond Dreams itegura irushanwa rya “I’m The Future” ryatangiye mu 2018 ryari rifite intego yo gushyigikira no kumenyekanisha abanyempano mu muziki.

Iri rushanwa ryatangiye mu 2018, riba uwo mwaka gusa ubundi rirahwekera kandi intego y’abariteguraga kwari ukujya riba buri mwaka.

Ku gicamunsi cyo kuri uyu wa Gatatu tariki 5 Gashyantare 2020 ni bwo amakuru yacaracaye ko bitameze neza mu buyobozi bwa kompanyi ya Diamond Dreams itegura “I’m The Future”. Amakimbirane y’aba bayobozi ba Diamond Dreams yavutse mu minsi ishize ashingiye ku bwumvikane buke bw’abahuriye muri iyi kompanyi aribo Tuyishime David uzwi nka David Pro na Mukeshimana Primitive wari washoyemo amafaranga ye.

Aganira na Igihe.com dukesha iyi nkuru, Mukeshimana Primitive uri mu kazi hanze y’u Rwanda, yagaragaje uko ikibazo nyiri zina uko gihagaze.

Yavuze ko we na David Pro bahuye bakaganira uko bakorana umushinga mu muziki, iki gihe David Pro yari afite igitekerezo cya “I’m The Future” ariko adafite ubushobozi bityo we yagombaga gushyiramo ubushobozi.

Yagize ati “Yambwiraga ko we nta mafaranga afite ariko yajya abona umwanya uhagije wo kwiruka mu bintu umunsi ku wundi ndetse akanabikurikirana nanjye nkashyiramo amafaranga aho bishoboka hose.” Ati ” Murabizi David Pro si umuswa mu kazi ke ka buri munsi ka Production, icyo yaburaga ni ibikoresho kandi mwarabibonye ko nari nagerageje kugura ibishoboka byose. Naguze ibikoresho, nishyura inzu nini yo gukoreramo ndetse nanamuha imodoka yo kuba akoresha mu kazi ka buri munsi.” Mukeshimana avuga ko yimuriye ibikorwa bya kompanyi mu nyubako igezweho iri Kimironko.

Mu minsi ishize ni bwo nyiri iyi nzu yibukije Mukeshimana ko bagomba kwishyura ukwezi kwarangiye nawe abaza David uko ibikorerwa muri iyo nzu bimeze, undi amubwira ko batari gukora kuko nta mafaranga bafite. Ati ” Ese ko twari twakoze studio n’ibindi bikorwa ngo bibyare amafaranga andi yashakaga ni ayahe? Ni ay’iki?”

Mukeshimana avuga ko yaje kumenya ko David Pro yagiye muri Kenya ku mpamvu zitazwi bituma amwandikira amubwira ko niba batari gukorera muri iyi nzu atakomeza kuyishyura ahubwo bafata umwanya bagahagarika ibikorerwamo.

Anashinja David Pro kuba yaragiye mu biro bye agakuramo ibyangombwa by’ubutaka bwe akabyiyandikishaho mu buryo bunyuranyije n’amategeko.

Ibi byaje gukazwa n’uko hari amakuru yageze kuri uyu mubyeyi avuga ko David Pro kuri uyu wa Gatatu tariki 5 Gashyantare 2020 yagiye Kimironko ku biro by’iyi kompanyi agapakira ibikoresho ashaka kwimuka icyakora ngo umugambi we wakomwe mu nkokora nuko uyu mubyeyi yabimenye mbere akiyambaza inzego zinyuranye yaba iz’ibanze ndetse n’umuryango we, bakabatesha.

Mukeshimana avuga ko mu gihe David Pro yaba atamusubije ibyangombwa bye ku neza ngo umutungo we awusubirane bakizwa n’inkiko cyane ko ibyo uyu musore yakoze binyuranyije n’amategeko.

Yagize ati ” Nasabye umunyamategeko wanjye n’abo mu muryango ko bamubwira akansubiza umutungo wanjye yiyandikishijeho ubundi tugasigara tureba ibindi uko byifashe. Nta deni murimo ngo yagwatiriye ibyanjye. Icyo yakoze ni icyaha gihanwa n’amategeko kandi nziko nk’umuntu mukuru atakora ikosa ryo gukinisha amategeko kandi ayazi.”

Uyu mubyeyi yongeyeho ko hari amakuru ari kwakira y’uko n’imodoka yari yaratije David Pro yaba yahishwe mu rwego kugira ngo inyerezwe ariko ngo ibyo byose byatangiye gukurikiranwa mu buryo bw’amategeko kandi aho bikenewe ko bajya mu nkiko yiteguye kuburana.

Ku bijyanye na I’m The Future”, Mukeshimana yavuze ko atakwemera guhagarika umushinga yashoyemo amafaranga menshi kubera amakosa y’umuntu umwe. Yagize ati “Urumva nashora miliyoni zirenga ijana mu mushinga ugahagarara gutyo gusa? Ntabwo bishoboka. Uzakomeza, kuba David avuyemo akoze amanyanga ntibivuze ko atasimburwa. Iki gikorwa cyategurwaga na kompanyi duhuriyemo rero niba ashatse kubizanamo amanyanga nyine ubwo aragenda dushake undi umusimbura kandi barahari benshi.”

Yakomeje agira ati:”Ubu ni bwo ahubwo igiye kuba neza, uwayidindizaga ubwo yigaragaje akaba agiye ubu igiye gukorwa kandi nizeye ko izagenda neza.”

David Pro ntiyabashije kugira icyo abivugaho kuko ntiyabonekaga kuri terefone.

“I’m The Future” yabaye bwa mbere mu mpera za 2018 yegukanwa na Gusenga Marie France wahawe Miliyoni 15 z’amafaranga y’u Rwanda mu gihe uwa kabiri yabaye Mugisha Lionel wegukanye miliyoni zirindwi z’amafaranga y’u Rwanda (7 000 000frw).

Mu mwaka wa 2019 hategerejwe ko iri rushanwa ryongera kuba abantu baraheba na ho ryari ribuditse ibi bibazo byari bitaraturika ngo abantu bamenye ikiri kurisibya.

Src: Igihe.com

Leave a Reply

Your email address will not be published. Required fields are marked *