Dore byinshi utari uzi ku buzima bwa Kizito Mihigo witabye Imana akiri ingaragu

Umusore w’ imyaka 39 witwa Kizito Mihigo, RIB na Polisi byatangaje ko ejo tariki 17 Gashyantare 2020, yasanzwe muri kasho yapfuye, aho yari afungiye kuri Sitasiyo ya Remera nyuma yo gufatwa ashaka kujya mu gihugu cy’Uburundi mu buryo butemewe.

Kizito Mihigo yavukiye i Kibeho mu karere ka Nyaruguru mu majyepfo y’u Rwanda, ku itariki ya 25 Nyakanga 1981, apfa ku itariki ya 17 Gashyantare 2020. Kizito Mihigo kandi yari anafite centure noire mu mukino wa Karate.

Kizito Mihigo, ni umwana wa gatatu mu bana batandatu ba Augustin Buguzi na Placidie Ilibagiza bishwe muri Jenoside yakorewe abatutsi mu Rwanda mu mwaka wa 1994.

Ku myaka 9 y’amavuko, Kizito Mihigo, yatangiye guhanga indirimbo, se na we akaba yari asanzwe ahanga indirimbo zo muri Kiliziya Gatolika aho iwabo i Kibeho.

Nyuma yo kugirwa imfubyi muri Jenoside yakorewe abatutsi mu Rwanda mu mwaka wa 1994, yahungiye i Burundi – hahana imbibi n’akarere ka Nyaruguru avukamo – aho yongeye guhura na bamwe mu bo mu muryango we bari barokotse.

Nkuko bigaragara ku rubuga rwa internet, nyuma ubwo yari agarutse mu Rwanda mu kwa karindwi mu 1994, yaje kugerageza kwinjira mu ngabo za RPF – ariko ntibyamuhira – ashaka kwihorera ku bishe abo mu muryango we. Ariko binyuze mu kwemera kwa gikristu no mu muziki, yaje kumenya kubabarira ababarira n’abishe se.

Yamamaye mu ndirimbo zo muri Kiliziya Gatolika nyuma yo gutangira amashuri yisumbuye kuri Seminari Nto ya Karubanda mu mujyi wa Huye, mu majyepfo y’u Rwanda.

Bivugwa ko icyo gihe yabaye icyatwa mu bahanzi b’indirimbo zo muri Kiliziya Gatolika mu Rwanda. Aho mu mashuri yisumbuye – yarangirije muri Collège St André i Kigali, ni naho yigiye umukino wa Karate, agera no ku mukandara wo hejuru cyane w’umukara (ceinture noire).

Mu 2001 yagize uruhare mu ihangwa ry’indirimbo yubahiriza igihugu izwi nka Rwanda Nziza, nyuma azakubona buruse (bourse/scholarship) ya Perezida Paul Kagame yo kujya kwiga umuziki mu ishuri rya Conservatoire de Paris mu Bufaransa. Umuziki we ku rwego mpuzamahanga yaje kuwutangirira mu Bubiligi, ahaba n’imiryango myinshi y’Abanyarwanda n’abandi bantu bakomoka mu karere k’ibiyaga bigari.

Mu mwaka wa 2011 ni bwo Kizito yasubiye mu Rwanda, aba umuhanzi ukunzwe cyane. Yatumirwaga mu mihango yo kwibuka Jenoside, ndetse agatumirwa no mu mihango ya leta agafasha mu kuririmba indirimbo yubahiriza igihugu, hari na Perezida Kagame.

Muri iyo myaka kandi yagiye anengwa na bamwe b’ukwemera kwa gikirisitu, bavuga ko bisa nkaho impano ye iri kwigarurirwa n’ibikorwa bya politiki. Ariko mu 2011, yagerageje kongera indirimbo n’ibitaramo by’indirimbo zaririmbiwe Imana, ibitaramo byitabirwaga n’imbaga ibarirwa mu bihumbi.

Muri uwo mwaka mu kwezi kwa munani ni nabwo abinyujije mu muryango we Imbuto Foundation, Jeannette Kagame, Madamu wa Perezida Kagame, yahembye umuhanzi Kizito nk’umwe mu rubyiruko rwageze ku bikorwa bikomeye bifasha rubanda.

Mu 2013, ikigo cy’igihugu cy’imiyoborere, Rwanda Governance Board, cyahembye umuryango we Kizito Mihigo Peace Foundation nk’umwe mu miryango 10 itegamiye kuri leta yateje imbere imiyoborere myiza mu gihugu. Uwo muryango we uhembwa amafaranga 8,000,000 nk’uko byatangaje na BBC dukesha iyi nkuru.

Mu mwaka wa 2010, yashinze umuryango utegamiye kuri leta, Kizito Mihigo Foundation, ugamije kubiba amahoro n’ubwiyunge.

Asubiye mu Rwanda mu mwaka wakurikiyeho, yatangiye kuzenguruka mu mashuri no mu magereza atanga ubwo butumwa, ku nkunga ya leta y’u Rwanda, umuryango World Vision International n’ambasade y’Amerika mu Rwanda.

Nyuma gato y’uko asohoye indirimbo yise ’Igisobanuro cy’urupfu’ yasohoye mu 2014 habura gato ngo u Rwanda rwibuke Jenoside ku nshuro ya 20 nibwo yatawe muri yombi akurikiranyweho ibyaha birimo no gushaka kugirira nabi umukuru w’igihugu.

Ku itariki ya 7 y’ukwa kane mu 2014, byatangajwe ko Kizito wari umenyerewe mu mihango yo kwibuka Jenoside yaburiwe irengero. Nyuma byatangiye guhwihwiswa ko Kizito ari mu maboko ya polisi kubera iyo ndirimbo ye itavugwaho rumwe.

Ku itariki ya 15 y’ukwa kane, polisi y’u Rwanda yamweretse abanyamakuru, ivuga ko yatawe muri yombi akekwaho gutegura ibitero by’iterabwoba no gukorana n’imitwe ya FDLR na RNC bagamije guhirika ubutegetsi buriho mu Rwanda.

Mu kwa kabiri mu 2015, yakatiwe gufungwa imyaka 10 nyuma yo guhamwa n’ubufatanyacyaha mu mugambi wo guhirika ubutegetsi bw’ u Rwanda.

Ku itariki 15 y’ukwa cyenda mu 2018, hamwe n’izindi mfungwa zirenga 2,000, Kizito Mihigo na Victoire Ingabire – umunyapolitike utavuga rumwe n’ubutegetsi buriho mu Rwanda – bafunguwe ku mbabazi za Perezida Kagame.

Ku itariki ya 13 y’uku kwezi kwa kabiri, urwego rw’ubugenzacyaha mu Rwanda (RIB) rwatangaje ko inzego z’umutekano zarushyikirije Kizito Mihigo wafatiwe mu karere ka Nyarurugu ashaka kwambuka mu buryo bunyuranyije n’amategeko ajya i Burundi agamije kwifatanya n’imitwe y’iterabwoba irwanya u Rwanda.

RIB yavugaga ko iperereza ryatangiye kuri ibyo byaha no ku cyaha cya ruswa ngo ashyikirizwe ubucamanza.

Umuntu warekuwe ku mbabazi za perezida ategekwa kujya kwiyereka ubushinjacyaha buri kwezi no gusohoka mu gihugu abiherewe uruhushya n’urwego rushinzwe ubucamanza.

Ku munsi w’ejo ku wa mbere, polisi y’u Rwanda yatangaje ko Kizito, ku myaka 38 y’amavuko, yapfuye “yiyahuye” aho yari amaze iminsi itatu afungiye kuri sitasiyo ya polisi i Remera.

Ariko impirimbanyi ziba mu mahanga ntizemera ibyo byavuzwe na polisi y’u Rwanda, zikavuga ko ahubwo yishwe, zikanasaba ko hakorwa ubundi bushishozi n’igenzura ryihariye ku rupfu rwe.

Leave a Reply

Your email address will not be published. Required fields are marked *