Dore amafaranga Perezida Kenyatta yemeye kuzajya akatwa ku mushahara mu guhangana na COVID-19

Uhuru Kenyatta, Perezida wa Kenya, yatangaje ko Guverinoma igiye kugoboka abaturage bayo bafite amikoro make binyuze mu kwigomwa kwa bamwe mu bakozi ba Leta bahembwa amafaranga menshi bazagabanyirizwa ku mishahara yabo uhereye no kuri we aho yemeye gukurwaho 80% by’umushahara we ngo ufashe abatishoboye bari kuzahazwa n’ingaruka z’ibihe bidasanzwe bya COVID-19.

Ibi Perezida Kenyatta yabitangaje kuri uyu wa Gatatu ubwo yagezaga ijambo ku banya-Kenya rikubiyemo uburyo igihugu kiri guhangana na Coronavirus ikomeje guhungabanya abatuye Isi, kikaba kimaze kwibasira abantu 28 muri iki gihugu.

Ubwo yasozaga inama yagiranye n’abagize inteko ishinga amategeko, Perezida Kenyatta yatanze ibwiriza ko Minisiteri y’abakozi ba Leta igomba gukata ku mishahara ya bamwe mu bakozi ba Leta bahembwa agatubutse bityo Leta ikabona uko igoboka imiryango itishoboye yahagaritse akazi muri ibi bihe byo gukumira icyorezo cya Coronavirus.

Yavuze ko we na Visi Perezida bagomba gukurwaho 80% ku mishahara yabo, abagize guverinoma nk’ abo mu Nteko Ishinga amategeko bagakurwaho 30% buri umwe, abakozi ba za minisiteri bagakurwaho 30% naho Abanyamabanga bakuru b’ibigo bya Leta bagakurwaho 20% hakiyongeraho n’ayateganyijwe na Leta kugira ngo haboneke asaga miliyari 10 z’Amashiringi ya Kenya azakoreshwa mu kugoboka abazagira ibibazo byatewe n’ifungwa ry’imirimo muri Kenya.

Mu yindi myanzuro yafashwe harimo ijyanye n’imisoro nk’aho umusoro ku nyungu (TVA) muri iki gihugu wakuwe kuri 16% ugashyirwa kuri 14% n’iyindi misoro itandukanye yiganjemo iy’imitungo itimukanwa, byombi bikazubahirizwa muri aya mezi igihugu kiri mu bihe bidasnzwe uhereye tariki 01 Werurwe 2020.

Hirya no hino mu bihugu bitandukanye harimo n’u Rwanda iki cyorezo kimaze guteza ibibazo by’ubukene abaturage bitewe n’uko imirimo ibyara inyungu myinshi yabaye ihagaze.

Perezida Kenyatta atangaje iyi myanzuro nyuma y’amasaha make Minisitiri w’Intebe wa Etiyopiya, Abiy Ahmed Ali atangaje ko yemeye guhara umushahara we w’ukwezi kose ngo ukoreshwe mu gufasha abazahajwe n’ikibazo cy’inzara no gushishikariza abafite amikoro muri iki gihugu gufasha abakeneye ubufasha muri ibi bihe bya Coronavirus.

Minisitiri w’Ubutegetsi bw’igihugu mu Rwanda, Prof. Shyaka Anastase yatangaje ko Leta y’u Rwanda yiteguye kuzagoboka abazahura n’ibibazo byiganjemo kubura ibyo kurya kubera imirimo ituma umuntu ava mu rugo yabaye ihagaritswe.

Abaturage bakaba baragiriwe inama yo kuguma mu ngo zabo kugira ngo hakumirwe kwanduzanya no gukwirakwiza iyi ndwara imaze kwandurwa n’abantu 40 mu Rwanda.

TERA INKUNGA UMUSOMYI.COM UKORA SHARE Y’IYI NKURU KANDI UTANGE IGITEKEREZO CYAWE KUGIRANGO TURUSHEHO KUBAGEZAHO IBYIZA BYINSHI KANDI BIBARYOHERA

Leave a Reply

Your email address will not be published. Required fields are marked *