Bwa mbere mu mateka, CAF yahisemo umujyi uzakira umukino wa nyuma wa Champions League

Bwa mbere mu mateka y’amarushanwa abiri akomeye ahuza amakipe yo ku mugabane wa Afurika (CAF Champions League na CAF Champions League), hazakinwa umukino wa nyuma umwe, aho kuba ibiri (ubanza n’uwo kwishyura) nk’uko byari bimaze kumenyerwa.

Muri Nyakanga umwaka ushize nibwo Impuzamashyirahamwe y’Umupira w’Amaguru muri Afurika, CAF, yemeje impinduka zikomeye mu buryo imikino ya nyuma ya CAF Champions League na CAF Confederation Cup yakinwagamo, ivuga ko hatazongera kubaho imikino ibiri ya nyuma guhera muri uyu mwaka w’imikino. CAF yemeje ko amarushanwa yombi azajya asozwa n’umukino wa nyuma umwe uzajya ubera ku kibuga cyihariye.

Aya marushwa yatangiye kuba mu myaka 55 ishize, yari asanzwe asozwa n’imikino ibiri ya nyuma, aho buri kipe yagiraga umukino umwe yakira, hakabaho ubanza n’uwo kwishyura.

Impuzamashyirahamwe y’Umupira w’Amaguru muri Afurika yari yatangaje ko guhera muri uyu mwaka w’imikino wa 2019/2020, imijyi itandukanye izajya isaba kwakira umukino wa nyuma wa rimwe muri aya marushanwa.

Iki cyemezo cyafashwe nyuma y’imvururu zabaye ku mukino wa nyuma wa CAF Champions League wahuje Espérance de Tunis na Wydad Casablanca mu mwaka ushize. Ubwo iyi kipe yo muri Maroc yahisemo kuva mu kibuga umukino wo kwishyura utarangiye kuko yangiwe igitego yatsinze ku munota wa 60.

Icyo gihe CAF yari yasabye Espérance de Tunis gusubiza igikombe yahawe, uyu mukino wa nyuma ugasubirwamo mu gihe aya makipe yombi yagaragaje ko adashaka kongera gukina, buri imwe ivuga ko ari yo ikwiye guhabwa igikombe, ariko umwanzuro w’Urukiko rwa Siporo (TAS) rukorera i Lausanne mu Busuwisi, wemeza ko iyi kipe yo muri Tunisie ari yo yegukanye irushanwa.

Umwe mu banyamakuru bakomeye mu Misiri, Medhat Chalabi, yatangaje ko CAF ifite icyicaro mu Mujyi wa Cairo, yahisemo Stade Mohamed V iri i Casablanca muri Maroc nk’ikibuga kizakira umukino wa nyuma wa Champions League uyu mwaka.

Misiri, Gabon, Sudani, Maroc na Afurika y’Epfo ni ibihugu byagarutsweho ko bifite ibibuga bishobora kwakira uyu mukino uhuza amakipe abiri ya mbere aba akomeye muri Afurika.

Icyemezo cya nyuma cy’uru rwego ruyobora Umupira w’amaguru muri Afurika ku Mujyi uzakira mukino wa nyuma wa Champions League kizatangazwa tariki ya 9 Gashyantare 2020.

Kugeza ubu iri rushanwa rigeze muri ¼, aho amakipe yabonye itike yo gukina iki cyiciro ari: Al Ahly (Misiri), Zamalek SC (Misiri), TP Mazembe (RDC), ES Tunis (Tunisie), Raja Casablanca (Maroc), Wyadad Casablanca (Maroc), Étoile du Sahel (Tunisie) na Mamelodi Sundwons (Afurika y’Epfo).

Leave a Reply

Your email address will not be published. Required fields are marked *