Aurlus Mabélé, umuhanzi wamamaye muri Soukouss yishwe na Coronavirus

Igihangange mu muziki wo muri Congo Brazzaville, Aurlus Mabélé yavuye mu mubiri kubera icyorezo cya COVID-19 kiri mu bihangayishije isi muri iki gihe.

Iby’urupfu rw’uyu muhanzi ubusanzwe witwaga Aurélien Miatsonama byatangajwe n’umukobwa we Liza Monet kuri uyu wa Kane. Yifashishije urubuga rwa Twitter yagaragaje ko se yitabye Imana ahitanywe na Corovirus.

Ati “Papa yapfuye mu gitondo cyo kuri uyu wa Kane yishwe na Coronavirus. Murakoze guha agaciro urwibutso rwe. Yari umunyabigwi ukomeye mu njyana ya Soukous, ariko abanye-Congo baramubuze uyu munsi […]”

Yakomeje avuga ko bigoye kumwihanganisha ndetse ari mu bihe bimukomereye kubera urupfu rwa se.

Aurlus Mabélé yaguye mu bitaro byo mu Bufaransa, aho yari yajyanywe ku wa Kane.

Aurlus Mabélé yavutse mu 1953, mu karere ka Poto-Poto ko muri Congo Brazzaville. Mu 1974 we na bagenzi be Jean Baron, Pedro Wapechkado na Mav Cacharel , yatangije itsinda Les Ndimbola Lokole ryamamaye cyane.

Yavuye muri iri tsinda ajya gukomereza ibikorwa bye mu Burayi, aza gushinga itsinda rya Loketo, afatanyije na Diblo Dibala na Mav Cacharel. Nyuma aza gutangiza injyana ya soukous afatwa nk’umwami wayo.

Uyu muhanzi azajya yibukirwa ku kuba yaratumye Soukous imenyekana ku ruhando mpuzamahanga, ikarenga imbibi za Afurika.

Afatanyije n’abahanzi mu gukirigita imirya ya Guitar yaririmbye indirimbo zakunzwe cyane zirimo ‘Africa Mousso’ , ‘La Femme ivoirienne’ , ‘Embargo’ , ‘Betty’ , ‘Asta De’ , ‘Evelyne’ , ‘Loketo’ n’izindi nyinshi.

Mu Bufaransa aho Aurlus Mabélé yabaga akaba ari naho yapfiriye kugeza muri iki gitondo tariki 20 Werurwe 2020 abantu 10,995 bamaze kwandura coronavirus naho 372 yarabahitanye.

Byatumye muri iki gihugu nta muntu ugipfa gusohoka mu nzu ndetse n’ushaka kugira aho atarabukira hari impapuro zashyizweho abanza akuzuza zamara gusuzumwa koko ko afite impamvu ituma asohoka mu nzu akabona kugenda.

TERA INKUNGA UMUSOMYI.COM UKORA SHARE Y’IYI NKURU KANDI UTANGE IGITEKEREZO CYAWE KUGIRANGO TURUSHEHO KUBAGEZAHO IBYIZA BYINSHI KANDI BIBARYOHERA

Leave a Reply

Your email address will not be published. Required fields are marked *