Amayobera ku ndege yahanutse itwaye ibikoresho byo kurwanya Covid-19 igahitana abarimo bose

Indege ifite izina rya Embraer 5Y-AXO yo muri Kenya yari itwaye ibikoresho byo kwifashisha mu kurwanya icyorezo cya Covid-19 yarasiwe muri Somalia mu mugi wa Bardale kuri uyu wa mbere tariki ya 4 Gicurasi 2020.

Abantu batandatu bari muri iyi ndege barimo Abanyakenya babiri b’abapilote: Capt. Mabruk Sherman na Omar Chiraghdin ndetse n’Abanya-Somalia bane bose bahasize umuzima.

Amakuru y’iyi ndege yabanje gutangazwa na Minisiteri w’Ubutwazi bw’ibintu n’abantu wa Somalia wavugaga ko yakoze impanuka, gusa avuguruzwa Minisitiri w’Ingabo yabwiye Ibiro Ntaramakuru by’Abongereza ko ‘yarashwe’ misile ntoya ya roketi (rocket).

Umunyamabanga Mukuru wa Somalia, Abdalle Ahmed Mumin, yemeje ko iyi ndege yarashwe n’ingabo za Ethipia habayeho ukwibeshya gusa nta rwego rubishinzwe rurabitangaza. Abdalle ku rubuga rwa Twitter ati: “Ingabo za Ethiopia zarashe iyi ndege zibeshye.”

Minisetiri y’Ububanyi n’Amahanga muri Kenya isaba Somalia ko yakora iperereza ryimbitse ku ihanurwa ry’iyi ndege kuko uburyo yarashwemo butarasobanuka.

Mu butumwa bw’iyi Minisiteri, iraswa ry’iyi ndege rishobora guteza icyuho mu bufasha bwohererezwa Somalia bwo kurwanya Covid-19.

Minisitiri w’Ububanyi n’Amahanga yagize ati: “Indege za Kenya n’izindi zohereza ubufasha mu Karere zisabwa kwigengesera cyane nyuma y’ibyabaye [kuri 5Y-AXO] mu buryo budasobanutse.”

Gusa ariko Minisitiri w’Ubutwazi bw’abantu n’ibintu muri Somalia yari yabwiye Reuters ko itsinda rikora iperereza ryoherezwa aho indege yarasiwe kuri uyu wa 5 Gicurasi.

N’ubwo Abdalle yemeje ko ingabo za Ethiopia ari zo zarashe iyi ndege, abarwanyi b’umutwe w’iterabwoba wa Al Shabaab nabo barakekwaho kuyirasa cyane ko aka gace ka Bardale kabamo ibirindiro byabo nk’uko Daily Nation yabitangaje.

Abarwanyi b’uyu mutwe kandi bazwiho guteza umutekano muke muri Somalia ndetse na Kenya, bagakoma mu nkokora ibikorwa byo kurinda amahoro mu bihugu byombi, aho wagiye wigamba kugaba ibitero ku ngabo z’ibihugu byombi ndetse n’iziri mu butumwa bw’amahoro, bagasenya ibikorwaremezo bitandukanye.

KANDA HANO WIREBERE AGAHINDA K’UYU MWANA, NTUCIKWE!

TERA INKUNGA UMUSOMYI.COM UKORA SHARE Y’IYI NKURU KANDI UTANGE IGITEKEREZO CYAWE KUGIRANGO TURUSHEHO KUBAGEZAHO IBYIZA BYINSHI KANDI BIBARYOHERA

Leave a Reply

Your email address will not be published. Required fields are marked *