Akanyaru: Hatoraguwe umurambo w’umukecuru bikekwa ko yiyahuye

Umukecuru witwa Mukamuriza Suzana wari utuye murenge wa Munini bamusanze mu mugezi w’ Akanyaru yapfuye. Birakekwa ko yiyahuye kubera amafaranga ibihumbi 280 umuryango we wariganyijwe n’uwo bakeka ko ari umutubuzi.

Ku wa Kane tariki 5 Werurwe 2020 nibwo umurambo w’ uyu mukecuru Suzana watoraguwe mu ruzi rw’ Akanyaru, ashyingurwa ku wa Gatandatu tariki 7 Werurwe 2020.

Uyu mukecuru yari aherutse kugurisha inka ye ibihumbi 280, ayo mafaranga umukobwa we ayaha uwo yibwiraga ko ari umukunzi we arayarwa.

Uyu mukobwa wa Suzana kuri ubu wahawe abantu bo kumuba hafi kugira ngo nawe atiyambura ubuzima, yari amaze amezi 6 avuye mu mujyi wa Kigali ari naho yamenyaniye n’ uyu mutekamutwe wamutwaye amafaranga ibihumbi 280.

Uyu mukobwa avuga ko uwo yitaga umukunzi we yamubwiye ko ashaka kuza kumusura iwabo mu murenge wa Munini, amubwira ako ageze mu nzira akagira ikibazo cy’amafaranga, uyu mukobwa ayamwoherereza kuri mobile money.

Umunyamabanga Nshingwabikorwa w’ Umurenge wa Munini Nkurunziza Aphrodice yatangaje ko bakeka ko aya mafaranga umukobwa wa Suzana yahaye uwo yitaga umukwe wa nyina bataziranye ariyo yabaye intandaro yo kwiyahura kwa Suzana kuko nta kindi kibazo yari afite.

Yagize ati “Twatekereje ko yananiwe kwakira ukuntu amafaranga yagiye ku mukwe atigeze abona bikaba aribyo byamuteye ikibazo”.

Nkurunziza avuka ko inama bagira abaturage ari ukwirinda guha amafaranga umuntu wese batazi neza no kutiyambura ubuzima igihe bahuye n’ikibazo ahubwo bakakiganiriza ubuyobozi bukakibafashamo.

Ibi bibaye mu gihe tariki 18 Gashyantare 2020 umwarimukazi wo mu karere ka Nyamagabe witwaga Irikujije Christine yiyahuye nyuma yo gutuburirwa amafaranga ibihumbi 177.

Src: Ukwezi

TERA INKUNGA UMUSOMYI.COM UKORA SHARE Y’IYI NKURU KANDI UTANGE IGITEKEREZO CYAWE KUGIRANGO TURUSHEHO KUBAGEZAHO IBYIZA BYINSHI KANDI BIBARYOHERA

Leave a Reply

Your email address will not be published. Required fields are marked *