Afghanistan: Perezida Ashraf Ghani yinangiye ku kuba yarekura imfungwa 5,000 z’Abatalibani

Perezida wa Afghanistan, Ashraf Ghani,  yavuze ko leta ye itigeze isezeranya kurekura imfungwa z’Abatalibani, nkuko bikubiye mu masezerano Amerika yagiranye n’umutwe w’Abatalibani.

Bijyanye n’ayo masezerano yanditse amateka yashyiriweho umukono muri Qatar, Abatalibani 5,000 bazarekurwa bitarenze ku itariki ya 10 y’uku kwezi kwa gatatu nk’ingurane y’abo muri leta ya Afghanistan bagera hafi ku 1,000 na bo bafunzwe ngo bafungurwe.

Bwana Ghani yavuze ko kurekura imfungwa nk’uko “bitagomba kuba igituma ibiganiro bibaho”, ariko bigomba kuba mu bindi bigize ibiganiro.

Amasezerano y’Amerika n’Abatalibani arimo no gukura ingabo z’Amerika, mu byiciro, muri Afghanistan.

Ku ruhande rw’umutwe w’Abatalibani, w’intagondwa zigendera ku mahame akaze y’idini ya kisilamu, wemeye kugirana ibiganiro by’amahoro na leta y’Afghanistan.

Ayo masezerano anasaba Abatalibani kubuza ko umutwe wa al-Qaeda n’indi mitwe igendera ku matwara y’ubuhezanguni gukorera mu bice Abatalibani bagenzura.

Amerika yateye Afghanistan hashize ibyumweru habaye ibitero byo mu kwezi kwa Nzeri mu mwaka wa 2001 i New York byakozwe n’umutwe wa al-Qaeda, icyo gihe wari ufite icyicaro muri Afghanistan.

Abatalibani bakuwe ku butegetsi, ariko bahinduka umutwe w’intagondwa wageze mu mwaka wa 2018 ukorera aharenga bibiri bya gatatu (2/3) by’igihugu cy’Afghanistan.

Mu gihe kitageze ku masaha 24 ayo masezerano ashyizweho umukono mu murwa mukuru Doha wa Qatar, Perezida wa Afghanistan yabwiye abanyamakuru mu murwa mukuru Kabul ati: “Kugabanuka kw’ibikorwa by’urugomo bizakomeza mu ntego yo kugera ku ihagarikwa ry’imirwano”. Ariko yongeyeho ati: “Nta kidusaba gufungura imfungwa 5,000. Ibi ni uburenganzira no ku bushake bwite bwa Afghanistan. Bishobora gushyirwa ku murongo w’ibyigwa mu biganiro bihuje Abanya-Afghanistan, ariko ntibishobora kuba igituma ibiganiro bibaho”.

Yongeyeho ko irekurwa ry’imfungwa iryo ari ryo ryose “ritareba ubutegetsi bw’Amerika” ahubwo ko “rireba leta ya Afghanistan”.

Bigereranywa ko Abatalibani 10,000 bafatiwe mu mirwano bafungiye mu magereza atandukanye muri Afghanistan.

TERA INKUNGA UMUSOMYI.COM UKORA SHARE Y’IYI NKURU KANDI UTANGE IGITEKEREZO CYAWE KUGIRANGO TURUSHEHO KUBAGEZAHO IBYIZA BYINSHI KANDI BIBARYOHERA

Leave a Reply

Your email address will not be published. Required fields are marked *