Abasirikari bahanuye indege ya Kenya muri Somalia babyiyemereye bavuga ko bayitiranyije

Abasirikare ba Ethiopia bagize segiteri ya gatatu baba mu gihugu cya Somalia bemeye ko ari bo barashe indege ya Kenya iherutse guhanurirwa muri Somalia.

Iyi ndege ya sosiyete ya African Express yo muri Kenya ikora ubwikorezi bwo mu kirere, yarashweho rocket ku wa mbere tariki ya 04 Gicurasi ubwo yagwaga ku kibuga cya Bardaale.

Ingabo za Ethiopia zavuze ko zayihanuye zikeka ko ishobora kuba irimo abarwanyi ba Al Shabaab, barimo bashaka aho bagaba igitero.

Brig. Gen. Alemu Ayene uyobora itsinda ziriya ngabo za Ethiopia, yavuze ko nta makuru bari bafite y’uko iriya ndege yerekeza i Bardaale ndetse mbere y’uko bayihanura bakaba barabuze uko bavugana na yo.

Ibinyamakuru byo muri Kenya bivuga ko bitumvikana kuba ingabo za Ethiopia zivuga ko zitari zizi amakuru y’iriya ndege, kandi yari ifite uruhushya rw’ikigo cya Somalia gishinzwe ingendo zo mu kirere.

Iperereza ryakozwe na Leta ya Somalia ku busabe bwa Perezida Uhuru Kenyatta wa Kenya na mugenzi we Mohamed Abdullahi Mohamed Farmaajo wa Somalia, rigaragaza ko iriya ndege yarashwe iri hafi y’ubutaka, ku buryo abakozi batatu bayo muri batandatu bari bayirimo nta kibazo bigeze bagira. Iperereza rikomeza rivuga ko abo bantu batatu bari barokotse bongeye kuraswa n’ingabo za Ethiopia kugira ngo bigaragare ko urupfu rwabo rufitanye isano n’iriya ndege.

Abantu batandatu bari bayirimo barimo bane b’abanya Kenya na babiri bo muri Somalia. Abayiguyemo barimo Captain Hassan Bulhan, umuhungu wa nyiri African Express Hassan Burhan.

Ihanurwa ry’iriya ndege ryateje umwuka mubi mu banya Politiki bo muri Somalia, bahise batangira gushyira igitutu kuri Perezida Farmaajo ndetse no ku buyobozi bw’ingabo z’umuryango wa Afurika yunze ubumwe ziri kubungabunga amahoro muri Somalia, AMISOM.

Ilyas Ali Hassan, Senateri wo muri Somaliya akaba n’umunyamabanga w’iki gihugu ushinzwe ububanyi n’amahanga, yavuze ko ibyakozwe na ziriya ngabo bishimangira ubufatanye butemewe bwa Perezida wa Somalia na Minisitiri w’intebe wa Ethiopia Dr Abiy Ahmed.

Yagize ati” Nyakubahwa Perezida, ubu twasobanukiwe neza amakuru y’ubufatanye butemewe hagati yawe na Abiy Ahmed, ibyo wahishe mu Nteko ishinga amategeko n’abaturage ba Somalia. Inteko ishinga amategeko n’abaturage ba Somalia bagomba gufata ingamba zihamye zo kurengera ubusugire bw’akarere ndetse n’amaraso ya Somaliya yamenekeye muri bardelle.”

Idd Bedel Mohamed wabaye umudipolomate wa Somalia, we yasabye Guverinoma ya Somaliya na Amisom gusobanura uwemereye kohereza ingabo zitari muri Amisom muri Somalia.

Yagize ati” Birasaba ubutwari n’ubuyobozi kwerura, kandi abayobozi bombi bagaragaje ubuhanga. Ku bayobozi ba Ethiopia, igihugu cyabo cyirizewe. Ethiopia ikwiye gusaba Perezida Farmaajo kuvugana n’abaturage, inteko ishinga amategeko ndetse n’abafatanyabikorwa mpuzamahanga ku kibazo cy’ingabo zitari iza Amisom ziri muri iki gihugu.”

Muri Somalia habarizwa ingabo za Ethiopia 4,395 ziri mu butumwa bwa Amisom, gusa izahanuye iriya ndege zo ntiziri mu butumwa bwa Afurika yunze ubumwe.

KANDA HANO WIREBERE AGAHINDA K’UYU MWANA, NTUCIKWE!

TERA INKUNGA UMUSOMYI.COM UKORA SHARE Y’IYI NKURU KANDI UTANGE IGITEKEREZO CYAWE KUGIRANGO TURUSHEHO KUBAGEZAHO IBYIZA BYINSHI KANDI BIBARYOHERA

 

Leave a Reply

Your email address will not be published. Required fields are marked *