Abanyarwanda baba mu mahanga, mu nzira baza mu Rwanda, ntibyoroshye na gato

Bamwe mu banyarwanda baba mu mahanga berekezaga mu Rwanda bafite impungenge ku rugendo rwa bo bitewe n’icyemezo Leta y’u Rwanda yafashe cyo gufunga ingendo z’indege.

Aba banyarwanda barimo abari bamaze guhaguruka berekeza mu Rwanda urugendo ruteganya ko bazahagera ku wa 21 Werurwe 2020 bikaba bigaragara ko batabasha kugera mu Rwanda kuko isaha ntarengwa izaba yarenze.

Nyirinkwaya Cynthia umwe mu banyeshuri b’Abanyarwanda bigaga muri Amerika yagize ati “Turi abanyeshuri biga muri Amerika turi mu nzira tujya Qatar. Indege yacu biteganyijwe ko izagera i Kigali ku wa Gatandatu ku manywa tariki ya 21 Werurwe. Mu gihe itangazo rivuga ko nta ndege izinjira cyangwa izasohoka mu Rwanda nyuma ya 20 Werurwe. Ni iki tugiye gukora?”

Umunyamabanga wa Leta muri Minisiteri y’Ububanyi n’Amahanga, Ambasaderi Olivier Nduhungirehe avuga ko ibibazo bijyanye n’ingendo abanyarwanda bari mu mahanga bafite bizajya bikemurwa na ambasade z’u Rwanda ziri mu bihugu baherereyemo.

Ku kibazo cy’abari bamaze guhaguruka berekeza mu Rwanda Ambasaderi Nduhungirehe yabwiye umunyamakuru wa Kigali Today ko Ambasade ziza kureba abantu bari mu nzira uko bangana hakarebwa ikindi gisubizo bashaka mu rwego rwo gukomeza urugendo cyangwa bagafashirizwa aho bari.

Bimwe mu byemezo Leta y’u Rwanda yafashe harimo n’icy’uko ingendo z’indege ziva cyangwa zijya mu Rwanda zahagaritswe harimo na RwandAir. Iki cyemezo kizatangira gukurikizwa guhera ku wa Gatanu tariki ya 20 Werurwe 2020 i saa 23:59 ku isaha yo mu Rwanda.

Izi ngamba zizamara igihe cy’iminsi 30 ishobora no kongerwa mu rwego rwo kwirinda ikwirakwizwa ry’icyorezo cya Coronavirus. Hemerewe gukomeza gukora gusa indege zitwara imizigo n’izikora ibikorwa by’ubutabazi.

Leta y’u Rwanda rurabarura abantu 11 bamaze kwandura Coronavirus mu gihe Leta y’u Rwanda n’inzego z’ubuzima bakomeje gukangurira abanyarwanda kunoza isuku no guhagarika ingendo za hato na hato mu rwego rwo gukumira ikwirakwizwa rya Coronavirus.

TERA INKUNGA UMUSOMYI.COM UKORA SHARE Y’IYI NKURU KANDI UTANGE IGITEKEREZO CYAWE KUGIRANGO TURUSHEHO KUBAGEZAHO IBYIZA BYINSHI KANDI BIBARYOHERA

Leave a Reply

Your email address will not be published. Required fields are marked *