Abakoresha indangamuntu bajya muri Congo bangiwe gusubirayo

Abakoreshaga umunsi ku wundi umupaka uhuza u Rwanda na Repubulika iharanira Demokarasi ya Congo uri i Rusizi bambukiye ku ndangamuntu, bavuga ko batangiye kugerwaho n’icyemezo bafatiwe cyo kutinjira muri Congo, bangirwa kwinjira muri iki gihugu.

Ku wa Gatatu tariki 19 Werurwe, Perezida wa Repubulika Iharanira Demokarasi ya Congo, Felix Antoine Tshisekedi, yatangaje ingamba zitandukanye mu rwego rwo kwirinda ikwirakwira rya Coronavirus, zirimo n’izigira ingaruka ku rujya n’uruza rw’abantu.

Abanyarwanda biganjemo abacuruzi b’amafi n’isambaza bakoreraga ubucuruzi muri Congo bambukiye ku mupaka wa Rusizi ya kabiri, babwiye VOA ko kiriya cyemezo cyabateje igihombo n’inzara, nyuma yo kuza kibatunguye.

Aba bacuruzi kandi bagaragaza ko batumva impamvu ababuzwa kwambuka ari abakoresha jeto bonyine, mu gihe abakoresha urwandiko rw’inzira ruzwi nka Laissez-passer bambuka nta kibazo.

Bagaragaza impungenge zabo bagize bati” Kuki bafungira ab’amajeto, ufite laissez-passer we ntabwo yarwara iyo ndwara? Ntabwo iyo ndwara itoranya, kimwe n’uko na bo bayizana.”

Undi mucuruzi na we yagize ati ” Icyiza si uko bamwe baza ngo abandi basigare. Niba ari ugufunga buri gihugu kigakurikirana abantu bacyo hose bikorwe, na ho kurekura abantu bamwe abandi bakambuka si cyo gisubizo.”

Ibi babitangaje nyuma yo guhabwa n’u Rwanda utujeto tubinjiza muri Repubulika Iharanira Demokarasi ya Congo, bagera ku mupaka wa Congo ku wa 20 Werurwe bagasubizwa inyuma.

Abacuruzi si bo bonyine bagezweho ingaruka na kiriya cyemezo, kuko n’abikoreraga imizigo ku mupaka bavuga ko ubuzima bwabo bwahagaze kubera cyo. Hari uwagize ati” Ubuzima bwahagaze kuko uretse iriya ndwara, n’inzara na yo iratwica.”

Aba baturage bahuriza ku kintu kimwe cyo gusaba kwemererwa gukomeza kujya muri Congo, ngo kuko ari ho bakesha amaramuko.

U Rwanda ntacyo rwahindura ku ngamba Repubulika Iharanira Demokarasi ya Congo yafashe, cyane ko na rwo hari izisa na zo rwafashe mu rwego rwo gukumira Coronavirus.

Cyakora cyo n’ubwo abambukira ku nzandiko z’inzira bari kwemererwa kwambuka muri iyi minsi, na bo bafite ubwoba bw’uko mu gihe gito bashobora gukumirwa, mu gihe icyorezo cya Coronavirus cyaba gikomeje kwiyongera hagati y’u Rwanda na Repubulika iharanira Demokarasi ya Congo.

Magingo aya muri Repubulika iharanira Demokarasi ya Congo harabarurwa abarwayi ba Coronavirus 14, ari na yo mpamvu Perezida Tshisekedi yafashe ingamba zirimo guhagarika amashuri, insengero, amasoko, ingendo z’indege ndetse no gukaza ingamba zo gusuzuma abanyura ku mipaka yose ya Repubulika iharanira Demokarasi ya Congo.

TERA INKUNGA UMUSOMYI.COM UKORA SHARE Y’IYI NKURU KANDI UTANGE IGITEKEREZO CYAWE KUGIRANGO TURUSHEHO KUBAGEZAHO IBYIZA BYINSHI KANDI BIBARYOHERA

One thought on “Abakoresha indangamuntu bajya muri Congo bangiwe gusubirayo

Leave a Reply

Your email address will not be published. Required fields are marked *