Finland: Abagabo bazajya bahabwa ikiruhuko cyo kubyara kingana nk’igihabwa abagore

Guverinoma ya Finland yatangaje ko irimo gukora amavugurura aho ababyeyi bombi bazajya bahabwa ikiruhuko cyo kubyara kingana kugira ngo n’abagabo babone igihe gihagije cyo kwita ku bana babo.

Izi mpinduka zatangajwe ku wa Gatatu w’iki cyumweru zizatangira kubahirizwa mu 2021, mu gutuma abagabo babona igihe cy’ikiruhuko kingana n’icy’abagore.

Aya mavugurura ni ay’ingenzi mu yakozwe na guverinoma nshya iyobowe na Sanna Marin, uyu akaba yaraciye agahigo ko kuba Minisitiri w’Intebe muto ubwo yajyaga kuri uyu mwanya umwaka ushize.

Muri aya mavugurura buri mubyeyi azaba yemerewe iminsi 164 y’ikiruhuko cyishyurirwa, bikaba biziyongera kuva ku mezi 11.5 kugera ku mezi arenga 14 kuri bombi.

Uwabyaye yibana azaba afite uburenganzira bwo gufata ikiruhuko cy’ababyeyi babiri.

Minisitiri ushinzwe Ubuzima n’Imibereho myiza, Aino-Kaisa Pekonen, yavuze ko iyi politiki nshya yerekana ko ishoramari rya guverinoma mu hazaza h’abana n’imibereho myiza y’imiryango. Ati “Amavugurura azaba impinduka ikomeye mu myumvire kandi azateza imbere uburinganire hagati y’ababyeyi ndetse atume ubuzima bw’abagize imiryango bworoha.”

Ku rundi ruhande ariko abayobozi b’inganda n’amashyirahamwe y’abakozi muri Finland banenze aya mavugurura, bavuga ko atazateza imbere uburinganire, umurimo ndetse n’agaciro k’abagore ku isoko ry’umurimo.

Iyi politiki nshya izakora ku babyeyi bose hatarebwe niba ari ab’umwana ku mubiri cyangwa ari uwo biyemeje kurera. Ababyeyi kandi bazaba bashobora gufata iminsi itarenga 69 y’ikiruhuko cyabo bakayiha inshuti zabo.

Ibi ahanini bikaba biri mu mugambi ukomeje gushyirwa imbere n’ibihugu by’u Burayi bihanganye cyane n’igipimo gito cyo kubyara.

Suède niyo ifite ikiruhuko kinini cy’ababyeyi kingana n’iminsi 240 kuri buri umwe nyuma yo kubyara.

Ubusanzwe muri Finland, ikiruhuko cyo kubyara cyari amezi 4.2 mu gihe abagabo bahabwaga amezi 2.2. Ikirenze ibi ni uko andi mezi y’ikiruhuko yashoboraga kugabanywa.

Leave a Reply

Your email address will not be published. Required fields are marked *